Pere Calders

Literatura katalaneko idazle irakurrienetakoa. Ipuingile gisa gailendu zen, baina kazetaritza artikuluak eta eleberriak ere idatzi zituen, besteak beste. Arte Ederretako ikasketak egin zituen. 1930eko hamarkadan eman zuen ezagutzera bere burua, hainbat aldizkaritan argitaratutako marrazki, artikulu eta ipuinen bidez. Hogeita lau urte zituela, bere lehen ipuin bilduma bat eta eleberria argitaratu zituen. Espainiako gerra zibila bukatzear zela, Mexikora erbesteratu zen eta hogeita hiru urtez bizi izan zen han, eta garai hartan idatzi zituen bere testu hoberenetako batzuk. 1962an itzuli zen Kataluniara. 1980ko hamarkadan oso ezaguna egin zen, Dagoll Dagom antzerki konpainiak haren ipuinetan oinarrituta prestatu zuen antzerki-lan bati esker: Antaviana. 1986an Letra Katalanen Ohorezko Saria jaso zuen eta 1993an Kazetaritza Sari Nazionala.